सुशांत पोवार (ठाणे) - महिलांच्या आरोग्याची काळजी घेत सार्वजनिक आरोग्य विभाग, महाराष्ट्र यांच्या माध्यमातून जिल्हा सामान्य रुग्णालय, ठाणे येथे सुरू असलेल्या मेनोपॉज क्लिनिकला काल शुक्रवार, दि. २१ रोजी विशेष भेट देण्यात आली. UNFPA India च्या प्रतिनिधी तसेच भूतानच्या Country Director Ms. Andrea M. Wojnar यांनी या क्लिनिकला भेट देऊन महिलांना दिल्या जाणाऱ्या तपासणी, समुपदेशन, उपचार आणि आरोग्यविषयक मार्गदर्शनाची माहिती घेतली. क्लिनिकची कार्यपद्धती आणि महिलांसाठी राबविण्यात येणाऱ्या विविध उपक्रमांचे त्यांनी कौतुक केले.
          जिल्हा शल्यचिकित्सक डॉ. कैलास पवार यांच्या नेतृत्वाखाली सुरू असलेले हे मेनोपॉज क्लिनिक महिलांना रजोनिवृत्तीच्या काळात आवश्यक वैद्यकीय सेवा, योग्य मार्गदर्शन आणि भावनिक आधार देण्यासाठी महत्त्वपूर्ण ठरत आहे. रजोनिवृत्ती हा महिलांच्या आयुष्यातील नैसर्गिक टप्पा असला तरी या काळात अनेक शारीरिक व मानसिक बदलांना सामोरे जावे लागते. त्यामुळे महिलांना योग्य वेळी वैद्यकीय सल्ला आणि उपचार मिळणे अत्यंत गरजेचे आहे. याच उद्देशाने अशा क्लिनिकच्या माध्यमातून महिलांपर्यंत दर्जेदार आरोग्यसेवा पोहोचविण्याचा प्रयत्न केला जात आहे.
        महिलांच्या आरोग्याबाबत जनजागृती वाढविणे, आवश्यक आरोग्यसेवा अधिकाधिक महिलांपर्यंत पोहोचविणे आणि अशा उपक्रमांना भविष्यात आणखी बळ देणे, हा सार्वजनिक आरोग्य विभागाचा सातत्यपूर्ण प्रयत्न आहे.