शिवराज मुगळे (सोलापूर) - सोलापूर दक्षिण विधानसभा मतदारसंघासाठी सायंकाळी सहा पर्यंत ५८.३५ टक्के मतदान झाले. एकूण तीन लाख ८२ हजार ७५४ मतदानापैकी २ लाख २३ हजार ३४२ मतदारांनी मतदानाचा हक्क बजावला आहे. 
             सकाळी सात वाजता कुडकुडणाऱ्या थंडीत मतदार लोकशाहीच्या या उत्सवात उत्स्फूर्तपणे सहभागी होत आपला मतदानाचा हक्क बजावण्यासाठी येऊ लागले होते. ग्रामीण भागातील अनेक गावांमध्ये मतदानासाठी चुरस दिसली. सोलापूर शहराच्या हद्दवाढ भागासह सर्व केंद्रावर शांततेत मतदान झाले. कोणताही अनुचित प्रकार न घडता सर्वच केंद्रावर शांततेत मतदान झाले. या मतदारसंघात भाजपचे सुभाष देशमुख, शिवसेनेचे अमर पाटील व अपक्ष उमेदवार धर्मराज काडादी यांच्यात तिरंगी लढत दिसून आली. 
           सकाळी सात पासून अनेक मतदान केंद्रावर मतदार येत असल्याचे चित्र दिसले. दुपारी बारापर्यंत सर्वच केंद्रावर मतदानासाठी मतदारांच्या रांगा लागल्या होत्या. पुन्हा चार नंतर मतदारांची संख्या वाढली. 
काँग्रेसचे नेते सुशीलकुमार शिंदे व खासदार प्रणिती शिंदे या अपक्ष उमेदवार धर्मराज काडादी यांच्यासह मतदान केले. त्यांनी काडादींना आज मतदानाच्या दिवशी पाठिंबा दिला. याचीच चर्चा दिवसभर होती. 
तालुक्यातील सर्वात मोठ्या मंद्रूप गावातील सर्वच बूथवर मोठ्या चुरशीने मतदान झाले. अमोगसिद्ध शेंडगे व मदाप्पा कुमठाळे या दोन्ही ८० वर्षाच्या ज्येष्ठ मतदारांनी मतदानाचा हक्क बजावला. येथे ६६ टक्के मतदान झाले. एकूणच विधानसभा मतदारसंघात पाच वाजेपर्यंत ५२ टक्के मतदान झाले होते. सहा वाजेपर्यंत मतदानाची वेळ असल्याने मतदानाची टक्केवारी आणखी वाढली. 
भाजपसह शिवसेना व काडादी समर्थक काँग्रेसचे नेते जास्तीत जास्त मतदान करून घेण्यासाठी धडपड करताना दिसत होते. माळकवठे येथे मतदान केंद्राजवळ गर्दी केल्याने पोलीसांनी तरुणांना हटकले. मात्र ते ऐकत नसल्याने व पोलिसांनी लाठी चार्ज केला. यामुळे काही काळ येथे तणावाचे वातावरण निर्माण झाले होते. उपविभागीय पोलीस अधिकारी संकेत देवळेकर, सहाय्यक पोलीस निरीक्षक मनोज पवार यांच्यासह पोलिसांचा ताफा रात्रीपर्यंत होता. 
याशिवाय भंडारकवठे, विंचूर, कुसुर, कंदलगाव, टाकळी, कुरघोट येथे मतदान करून घेण्यासाठी चुरस दिसली. तसेच होटगी भागातील आहेरवाडी, होटगी स्टेशन, फताटेवाडी, बंकलगी, कणबस, तसेच हत्तुर, औराद, बरूर, हत्तरसंग येथेही चुरशीने चांगले मतदान झाले.

झालेले मतदान असे 
मतदार(पुरुष ) १,९५,७५१, झालेले मतदान ११५६४१
मतदार (स्त्री ) १,८६,९६४, झालेले मतदान १०७६९१
एकूण मतदान ३,८२,७५४, झालेले मतदान २२३३४२