सुशांत पोवार (विशेष वृत्त) - डाॅ.भगवान पवार हे पुणे महापालिकेत आरोग्य अधिकारी असताना त्यांनी तत्कालीन आरोग्यमंत्री तानाजी सावंत यांच्याशी पंगा घेतला होता. मुख्यमंत्र्यांना पत्र लिहून सावंत यांच्याकडून बेकायदेशीर टेंडरसाठी दबाव येत असल्याचे त्यांनी म्हटले होते. सावंत यांना नडणाऱ्या पवार पुन्हा चर्चेत आले आहेत. आरोग्य सेवकामार्फत लाच स्वीकारण्याचा आरोप त्यांच्यावर होत आहे. सध्या त्यांच्याकडे आरोग्य उपसंचालक पदाचा कार्यभार आहे.
         आरोग्य उपसंचालक विभागातील आरोग्य सेवकाने बदलीसाठी तीन लाख रुपयांची लाच मागितल्या प्रकरणी लाचलुचपत प्रतिबंधक विभागाने (एसीबी) एका आरोग्य सेवकाविरोधात गुन्हा दाखल केला आहे. जिल्हा परिषद कार्यालयासमोर सार्वजनिक रस्त्यावर सापळा रचून ही कारवाई करण्यात आली. तक्रारदार (वय ४१) हा आरोग्य सेवक असून, जून २०२५ मध्ये त्यांची उपसंचालक कार्यालय कोल्हापूर मंडळ येथून उपसंचालक कार्यालय पुणे मंडळ येथे अंतरमंडळ बदली झाली होती. मात्र, पुणे मंडळात त्यांना अद्याप पदस्थापना देण्यात आलेली नव्हती. प्राथमिक आरोग्य केंद्र, बावडा (ता. इंदापूर, जि. पुणे) येथे रिक्त असलेल्या आरोग्य सेवक पदावर नेमणूक मिळावी, यासाठी त्यांनी विनंती अर्ज केला होता.
          या अनुषंगाने आरोग्य उपसंचालक डॉ. भगवान पवार यांची भेट घेतली असता, त्यांनी संशयित रामकिसन घ्यार यांच्याशी संपर्क साधण्यास सांगितले. त्यानंतर संशयिताने तक्रारदारास मागितलेल्या ठिकाणी बदली करून देण्यासाठी डॉ. पवार यांच्यासाठी तीन लाख रुपये द्यावे लागतील, अशी मागणी केल्याचे तक्रारीत नमूद आहे. याबाबत तक्रारदाराने २ डिसेंबर रोजी पुणे एसीबीकडे तक्रार दाखल केली. एसीबीने सापळा रचून रामकिसन गंगाधर घ्यार याला अटक केली. या प्रकरणी बंडगार्डन पोलिस ठाण्यात भ्रष्टाचार प्रतिबंध अधिनियम, १९८८ अंतर्गत गुन्हा दाखल करण्यात आला आहे. ही कारवाई एसीबीचे पोलिस अधीक्षक शिरीष सरदेशपांडे, अतिरिक्त पोलिस अधीक्षक अजित पाटील यांच्या सूचनेनुसार निरीक्षक प्रसाद लोणारे यांच्या नेतृत्वाखाली करण्यात आली. पुढील तपास पोलिस निरीक्षक आसावरी शेडगे करीत आहेत.